ການແຂ່ງຂັນກິລາເຕະບານມິດຕະພາບນັດທຳອິດ
ເພື່ອ ເປັນການສ້າງຂະບວນການສະເຫຼີມສະຫຼອງວັນກຳມະກອນສາກົນ ວັນທີ 1 ພຶດສະພາ ທີ່ໝູນວຽນມາບັນ ຈົບຄົບຮອບອີກວາລະໜຶ່ງ, ໃນຕອນແລງຂອງວັນທີ 30 ເມສາ 2009 ຢູ່ທີ່ເດີ່ນເຕະບານ ພະນາວັນ ໄດ້ມີການແຂ່ງຂັນກິລາເຕະບານ ມິດຕະພາບ ລະຫວ່າງ ຫ້ອງການສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ ແລະ ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ຊຶ່ງທິມເຕະບານຫ້ອງການສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ ນຳພາທິມໂດຍທ່ານ ສົມດີ ອິນມີໄຊ, ຫົວໜ້າ ຫ້ອງການສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ ສ່ວນທິມເຕະບານພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ນຳພາທິມໂດຍທ່ານ ເບີລິນ ເພັດຈັນທະລາດ, ຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ.
ພາຍຫຼັງການແຂ່ງຂັນເລີ່ມຂຶ້ນ ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ເປັນຝ່າຍຍິງປະຕູຂຶ້ນນຳໄປກ່ອນ, ແຕ່ວ່າ ພາຍຫຼັງເຄິ່ງເວລາທີ 1 ຜ່ານໄປ ທິມຫ້ອງການສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ ເປັນຜູ້ນຳຢູ່ 5-3. ໃນເຄິ່ງເວລາທີ 2 ທິມຫ້ອງການສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ ກໍ່ຍັງສືບຕໍ່ຍິງປະຕູນຳໜ້າໄດ້ຢ່າງຕໍ່ເນື່ອງ. ເຖິງແນວໃດກໍ່ຕາມ ທິມພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໄດ້ພະຍາຍາມຍິງປະຕູໄລ່ຕາມ ຈົນໝົດເວລາການແຂ່ງຂັນທັງສອງທິມຈຶ່ງສະເໝີກັນໄປຢ່າງດຸ ເດືອດ 7-7. ການແຂ່ງຂັນດຳເນີນໄປດ້ວຍບັນຍາກາດຄຶກຄື້ນມ່ວນຊື່ນ ຊຶ່ງຕ່າງຝ່າຍຕ່າງກໍ່ຜັດປ່ຽນກັນບຸກ ແລະ ສ້າງ ຄວາມຫວາດສຽວຢ່າງຕໍ່ເນື່ອງ ອັນໄດ້ສ້າງຄວາມຕື່ນເຕັ້ນໃຫ້ແກ່ຜູ້ຊົມ ແລະ ກອງເຊຍ ຢູ່ຂອບສະໜາມ ຕະຫຼອດການແຂ່ງຂັນ.
ການແຂ່ງຂັນຄັ້ງນີ້ເປັນການແຂ່ງຂັນ ເຕະບານມິດຕະພາບນັດທຳອິດລະຫວ່າງສອງພາກສ່ວນ ນັບແຕ່ມີການສ້າງຕັ້ງຫ້ອງການສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ ໃນປີ 2005 ເປັນຕົ້ນມາ, ຊຶ່ງການແຂ່ງຂັນຄັ້ງນີ້ ນອກຈາກຈະເປັນການສ້າງຂະບວນການສະເຫຼີມສະຫຼອງວັນກຳມະກອນສາກົນ ໃຫ້ເປັນຂະບວນຟົດຟື້ນ ແລະ ສ້າງໂອກາດໃຫ້ພະນັກງານໄດ້ອອກກຳລັງກາຍ ເພື່ອສ້າງພາລະກຳລັງແລ້ວ ຍັງເປັນການຮັດແໜ້ນຄວາມສາມັກຄີຮັກແພງ ແລະ ສ້າງຄວາມລຶ້ງເລີຍລະຫວ່າງພະນັກງານຈາກທັງສອງພາກ ສ່ວນ ຊຶ່ງຈະເປັນການປະກອບສ່ວນຊ່ວຍໃຫ້ການ ປະສານງານ ແລະ ປະຕິບັດວຽກງານວິຊາສະເພາະຕາມພາລະບົດບາດລະຫວ່າງສອງພາກສ່ວນ ມີຄວາມຄ່ອງຕົວ ແລະ ສະດວກວ່ອງໄວຍິ່ງຂຶ້ນ.
Posted by: policy
[ back ]