ຂ່າວໄໝ່

ພິທີເປີດຫ້ອງການສົ່ງເສີມ ແລະ ພັດທະນາ ວິສາຫະກິດຂະໜາດນ້ອຍ ແລະ ກາງ (ຫສວ) ຢ່າງເປັນທາງການໄດ້ຈັດຂຶ້ນ ໃນເວລາ 16:00 ໂມງ ຂອງວັນທີ 7 ເມສາ 2006 ທີ່ຫ້ອງການສົ່ງເສີມ ແລະ ພັດທະນາ ວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະ ກຳ ແລະ ຫັດຖະກຳ. ເປັນກຽດເຂົ້າຮ່ວມໃນພິທີ ດັ່ງກ່າວມີທ່ານ ອ່ອນເນື້ອ ພົມມະຈັນ ລັດຖະມົນຕີວ່າການ ກະຊວງ ອຸດສາຫະກຳ ແລະ ຫັດຖະກຳ, ປະທານຄະນະກຳມະການສົ່ງເສີມ ແລະ ພັດທະນາ ວິສາຫະກິດ ຂະໜາດນ້ອຍ ແລະ ກາງ, ທ່ານ ນາງ Esther Weiss ອຸປະທູດຊົ່ວຄາວ ແຫ່ງສາທາລະນະລັດ ສະຫະພັນເຢຍລະມັນ ປະຈຳ ສປປລາວ ພ້ອມດ້ວຍບັນດາທ່ານ ໃນຄະນະກຳມະການສົ່ງເສີມ ແລະ ພັດທະນາ ວິສາຫະກິດຂະໜາດນ້ອຍ ແລະ ກາງ, ບັນດາແຂກຈາກອົງການຈັດຕັ້ງຂອງລັດອ້ອມຂ້າງ ສູນກາງ, ອົງການຈັດຕັ້ງສາກົນ ແລະ ວິສາຫະກິດຕ່າງໆ ເຂົ້າຮ່ວມຫຼາຍກ່ວາ 80 ທ່ານ.

ໃນພິທີ ທ່ານ ສົມດີ ອິນມີໄຊ, ຫົວໜ້າຫ້ອງການສົ່ງເສີມພັດທະນາວິສາຫະກິດຂະາດ ນ້ອຍ ແລະ ກາງໄດ້ ລາຍງານຫຍໍ້ກ່ຽວກັບຄວາມເປັນມາຂອງການສ້າງຕັ້ງຫ້ອງການສົ່ງ ເສີມ ແລະ ພັດທະນາ ວິສາຫະກິດຂະໜາດນ້ອຍ ແລະ ກາງ ໂດຍສະເພາະແມ່ນການສ້ອມແປງ ປັບປຸງອາຄານຫ້ອງການ ຊຶ່ງ ໄດ້ຮັບການສະໜັບສະໜູນທາງດ້ານທຶນຮອນຈາກລັດຖະບານ ສາທາລະນະລັດສະຫະພັນເຢຍລະມັນ.

ຫຼັງຈາກນັ້ນ ທ່ານ ອ່ອນເນື້ອ ພົມມະຈັນ, ລັດຖະມົນຕີວ່າການກະຊວງ ອຸດສາຫະກຳ ແລະ ຫັດຖະກຳ, ປະທານຄະນະກຳມະການສົ່ງເສີມແລະ ພັດທະນາວິສາຫະກິດຂະໜາດນ້ອຍ ແລະ ກາງ ໄດ້ມີຄຳເຫັນຕໍ່ພິທີ ຊຶ່ງທ່ານໄດ້ເນັ້ນເຖິງຄວາມສຳຄັນຂອງວິສາຫະ ກິດຂະໜາດນ້ອຍ ແລະ ກາງ ຕໍ່ພື້ນ ຖານເສດຖະກິດຂອງຊາດ ແລະ ຄວາມພະຍາຍາມຂອງ ລັດຖະບານໃນການຊຸກຍູ້ສົ່ງເສີມ ວິສາຫະກິດ ເຫຼົ່ານັ້ນ. ພ້ອມດຽວກັນ ທ່ານໄດ້ ສະແດງຄວາມຂອບ ໃຈຕໍ່ບັນດາປະເທດເພື່ອນມິດ ແລະ ອົງການຈັດຕັ້ງ ສາກົນທີ່ໄດ້ໃຫ້ການສະໜັບສະໜູນ ຊ່ວຍເຫຼືອວຽກງານວິສາຫະກິດຂະໜາດນ້ອຍ ແລະ ກາງ ຂອງ ສປປລາວ ມາໂດຍຕະຫຼອດ ແລະ ໄດ້ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງຈົ່ງໃຫ້ການຮ່ວມ ມື ແລະ ສຸມຄວາມສາມາດເຂົ້າ ໃນການຜັນຂະຫຍາຍແນວທາງນະໂຍບາຍຂອງລັດຖະບານໃນການ ສົ່ງເສີມ ແລະ ພັດທະນາວິສາ ຫະກິດຂະໜາດນ້ອຍ ແລະ ກາງໃຫ້ເກີດດອກອອກຜົນ.

ໃນພິທີອັນສະຫງ່າລາສີ ທ່ານ ອ່ອນເນື້ອ ພົມມະຈັນ, ລັດຖະມົນຕີວ່າການກະຊວງ ອຸດສາຫະກຳ ແລະ ຫັດຖະກຳ, ປະທານຄະນະກຳມະການສົ່ງເສີມແລະ ພັດທະນາວິສາຫະ ກິດຂະໜາດນ້ອຍ ແລະ ກາງ ໄດ້ຮ່ວມກັບທ່ານ ນາງ Esther Weiss ອຸປະທູດຊົ່ວຄາວ ແຫ່ງສາທາລະນະລັດສະຫະພັນເຢຍລະ ມັນ ປະຈຳ ສປປລາວ ຕັດແຂບຜ້າເປີດປ້າຍຫ້ອງ ການສົ່ງເສີມ ແລະ ພັດທະນາ ວິສາຫະກິດຂະໜາດ ນ້ອຍ ແລະ ກາງຢ່າງເປັນທາງການ. ຫຼັງຈາກນັ້ນແຂກຜູ້ມີກຽດໄດ້ເຂົ້າຢ້ຽມຊົມຫ້ອງການສົ່ງເສີມ ແລະ ພັດທະນາ ວິສາຫະກິດຂະໜາດນ້ອຍ ແລະ ກາງ ແລະ ເຂົ້າຮ່ວມຮັບປະທານອາຫານຄຳທີ່ໂຮງແຮມ ດອນຈັນ ພາເລດ.