ທືນຮອນສຳລັບທຸລະກິດ > ແຜນງານ SME ແລະ ການເງີນຈຸລະພາກ

ໝວດທີ III
ກອງທຶນສົ່ງເສີມ ແລະ ພັດທະນາ ວ ນ ກ

ມາດຕາ 11: ການສ້າງຕັ້ງກອງທຶນສົ່ງເສີມ ແລະ ພັດທະນາ ວ ນ ກ

ລັດຖະບານອະນຸຍາດ ໃຫ້ສ້າງຕັ້ງກອງທຶນ ສົ່ງເສີມ ແລະ ພັດທະນາ ວ ນ ກ ເພື່ອສະໜັບສະໜູນໂຄງການສົ່ງເສີມ ແລະ ພັດທະນາ ວ ນ ກ. ກອງທຶນດັ່ງກ່າວແມ່ນມອບໃຫ້ຫ້ອງການສົ່ງເສີມ ແລະ ພັດທະນາ ວນ ກ ຂັ້ນສູນກາງ ເປັນຜູ້ຄຸ້ມຄອງ. ລະບຽບການຄຸ້ມຄອງ ກອງທຶນສົ່ງເສີມ ແລະ ພັດທະນາ ວ ນ ກ ຈະໄດ້ ກຳນົດຕ່າງຫາກ.

ມາດຕາ 12 : ລາຍຮັບຂອງກອງທຶນສົ່ງເສີມ ແລະ ພັດທະນາ ວ ນ ກ

ກອງທຶນສົ່ງເສີມ ແລະ ພັດທະນາ ວ ນ ກ ໄດ້ມາຈາກແຫລ່ງຕ່າງໆ ດັ່ງລຸ່ມນີ້:

1. ງົບປະມານແຫ່ງລັດ
2. ການຊ່ວຍເຫຼືອລ້າ ຫຼື ການກູ້ຢຶມຈາກຕ່າງປະເທດ.
3. ການບໍລິຈາກ ຫຼື ການປະກອບສ່ວນຂອງບຸກຄົນ ຫຼື ອົງການຈັດຕັ້ງດ້ວຍຄວາມສະໝັກໃຈ.
4. ການບໍລິການ, ເກັບຄ່າທຳນຽມຕ່າງໆ ແລະ ອື່ນໆ.

ການນຳໃຊ້ກອງທຶນສົ່ງເສີມ ແລະ ພັດທະນາ ວ ນ ກ ແມ່ນເພື່ອເປົ້າໝາຍດັ່ງນີ້:

1. ສະໜັບສະໜູນບັນດາໂຄງການສົ່ງເສີມ ແລະ ພັດທະນາ ວນກ
2. ສະໜັບສະໜູນດ້ານສິນເຊື່ອແກ່ ວນກ
3. ຄ່າໃຊ້ຈ່າຍບໍລິຫານ ຂອງຄະນະກຳມະການສົ່ງເສີມ ແລະ ພັດທະນາ ວ ນ ກ .
4. ເງິນນະໂຍບາຍ ແລະ ຄ່າບຳເນັດ ຂອງພະນັກງານຫ້ອງການສົ່ງເສີມ ແລະ ພັດທະນາ ວ ນ ກ.
5. ບຳລຸງ ແລະ ກໍ່ສ້າງພະນັກງານຂອງຫ້ອງການສົ່ງເສີມ ແລະ ພັດທະນາ ວ ນ ກ ແລະ ພະນັກງານ, ກຳມະກອນ ຂອງພາກສ່ວນທຸລະກິດ.
6. ຄ່າບໍລິຫານຂອງຫ້ອງການສົ່ງເສີມ ແລະ ພັດທະນາ ວ ນ ກ
7. ວຽກງານອື່ນໆ ທີ່ກ່ຽວກັບການສົ່ງເສີມ ແລະ ພັດທະນາ ວນກ

ມາດຕາ 14 : ແຜນການລາຍຮັບ-ລາຍຈ່າຍຂອງກອງທຶນສົ່ງເສີມ ແລະ ພັດທະນາ ວ ນ ກ ປະຈຳປີ

ຄະນະກຳມະການສົ່ງເສີມ ແລະ ພັດທະນາ ວ ນ ກ ເປັນຜູ້ພິຈາລະນາຕົກລົງແຜນການລາຍຮັບ-ລາຍຈ່າຍ ປະຈຳປີ ແລ້ວສະເໜີໃຫ້ລັດຖະບານເປັນຜູ້ຕົກລົງຮັບຮອງເອົາ.